16. Королівський асесорський суд звільняє Матвія Немирича від претензій до ніби перехованого ним майна Андрія козака і від обвинувачень в участі в козацьких рухах. 1 грудня 1597 р.

Михайло Грушевський

Декрет меж Матфеемъ Немиричомъ судичомъ земскимъ киевскимъ а Флорыяномъ Олешкомъ писаромъ короннымъ.

Жикгимонть третий.

Ознаймуем тымъ листомъ нашимъ etc., иж кгды се приточила справа с позву задворного перед нась и судъ нашъ нинешный асесорский межы ин-стикгаторомъ нашымъ з деляцыи урожоного Флорыяна Олешка секретара и писара нашого яко поводом – з одное, а межы урожоным Матфеемъ Немиричомъ судичомъ земскимъ киевскимъ яко позванымъ – з другое стороны, ото иж бы позваный по зрайцы нашом и речы посполитое неяком Андрею козаку, змовившисе з слугою своимъ нияким Стефаномъ Родкевичом, который з ыными зрайцами нашыми козаковал, многые речы в позве менованые, яко спадковые, шафункови нашому належачые, не маючи до нихъ жадного права, привлащивши, собе на пожитокъ свой обернулъ, а такъ помененый Немирич позван былъ, абы такие речы Флориянови Олешкови, яко донаторови, отдалъ и того обцованя своего з людми козацкими справилсе, о чом ширей и достаточней на том позве описано и доложоно было, – на року теды нинешнемъ за тым позвомъ припаломъ и до того часу стегаючомсе дня первого месяца декабря року деветдесятъ семого, кгды позваный Немиричъ через возного енерала двору нашего шляхетного Криштофа Чыжевского дня третего яко завитого приволанъ былъ, шляхетный Криштофъ Бялобрийский от позваного з моцю зуполною, до нинешнего права собе в той справе даною, озвавшысе, тым сторону свою преречоного Немирича боронилъ, иж он тыхъ речей козацкихъ Андреевыхъ ни от кого не бралъ, в себе их не мелъ, не переховывалъ, ани их собе скорыстилъ и теж с козаками жадного сполку и обцованя не велъ, ани з ними мевалъ, и на томъ отводечысе ку присязе бралсе.

А такъ суд нашъ уважаючи то, же в таковыхъ речах завше обвиненый близшый ку отводу бывает припущонъ, про то позваному выш речоному Немиричу наказал присягнути на томъ, яко онъ спадковыхъ речей Андрея козака неякихъ у себе не мел, у себе ихъ не переховывалъ, ани их мает, также и сполкованя жадного с козаками не мевалъ, которую то присягу Матфей Немиричъ повиненъ будетъ выконати в Киеве на рочках кгродскихъ киевскихъ, которые напервей по выштю шестю недель от даты того декрету нашого рахуючы судитимутсе, и там вже обоя сторона рокъ певный и завитый мети будуть, такъ Немирич ку выконаню присеги, яко Олешко секретар нашъ або самъ або через умоцованого своего ку прислуханю ее; а скоро такъ присягнетъ, теды от тое справы через тоттамъ врядъ кгродский Немиричъ мает быти волнымъ учыненъ, моцю того декрету нашого, до которого на болшую твердость и печать наша коронная притиснена есть.

Писанъ у Варшаве лѣта Божого нароженя тисеча пять сотъ деветдесятъ семого месяца декабра первого дня, а панованя кролевствъ нашыхъ – полского десятого а шведського четвертого. Joan Tharnowsky r[egni] P[oloniae] vicecancell[arius]. Справа велебного в Бозе его милости ксендза Яна Тарновского, номината познанского, подкоронного. Florian Oleszko.

Записі В. кн. 11, л. 151 v.

Примітки

Подається за виданням: Грушевський М.С. Твори у 50-и томах. – Львів: Світ, 2004 р., т. 6, с. 330 – 332.