7. Рішення королівського суду в справі Лаврина Лозки з печерським архимандритом Никифором Туром про речі Григорія Лободи, ніби сховані у Тура. 20 вересня 1596 р.
Михайло Грушевський
Декрет межи Лозкою а архимандрытом киевскимъ.
Жикгимонт третий etc.
Ознаймуемы тымъ листомъ нашимъ нинешним и напотом будучимъ, ижъ кгды приточиласе перед нас и суд нашъ нинешний асесорский справа с позву задворного межи инстикгатором нашимъ з донесенья шляхетного Лаврина Лозки жолнера нашого яко поводом – з одное, а межи велебнымъ Никифоромъ Туромъ архимандритомъ киевскимъ манастыра Печерского и капитулою, чернцами того манастыра, яко позваными – з другое стороны о то, ижъ будучи позваные упомнены, абы речи лежачие и рухомые ниякого Григоря Лободы зрайци речи посполитое и нашого поводови тое справы, яко донаторови, отдали, которых то таковых речей позваные иж у себе их быти не поведали и не прызнали, инстикгатор нашъ з деляторомъ на две тисечи копъ для того шкод положывши, о то их до права притегнулъ, – на року теды нинешнемъ за тымъ позвомъ прыпаломъ кгды ся справы судовые задворные порядкомъ своимъ отправовали, дня девятогонадцать месяца сентебра року деветдесятъ шостого за першимъ прыволаньемъ через возного двору нашого сторона позваная, не ждучи водле права волынского третего прыволаня, отпоръ на жалобу чинечы, поведила, иж жадных речей Лободиных не брала ани их у себе ховала, и высветчалисе листомъ кашталяна каменецкого урожоного Якуба Претвица, в которомъ указовали сведецство его, же жадных речей козацких у них не нашлося.
Противъ тому сторона поводовая указала листь тогожъ кашталяна каменецкого з датою последнею, которымъ сознавалъ кашталянъ каменецкий, же слышалъ от людей, иж некоторые речы Лободины пры архимадрите зостат бы мели, и прошоно затымъ от повода, абы подлугъ того сезнанья кашталяна каменецкого архимандрите таковы речы Лободины отдать наказано.
Суд нашъ асесорский, прыпатрывшысе сведецством от обоей стороны показованымъ, а бачачи быт в том вонтливость, сказал архымандрите отводъ на томъ, яко речей Лободиных не бралъ и у себе их не ховалъ, не мел и не маетъ, а сторона поводовая, не прыймуючы того декрету асесорского, до насъ апелевала.
А кгды тая справа на реляцыях наших дни сегоднешнего месяца октебра первого дни реферована была в стороне обе иж тые жъ обороны своѣ, яко се первей щытили, вносили и повторали, а такъ мы господаръ с паны радами нашими пры боку нашомъ на сес час будучими нарадившысе, декрет асесоров наших утвердили есмо, наказуючы, абы архимандрыт киевский самъ-трет з двема чернцами, а от чернцовъ икон[ом] [Так я доповнюю се слово.] их з двема чернцами также само-треть в Киеве от даты сего декрету нашого по выйштю шести недел на перших рочках кгродскихь присегнули на томъ, яко жадныхъ речей Лободиных не брали и у себе их не ховали, не мели и не мают, и тамъ уже обоя сторона рокъ певный и завитый мети будуть, такъ позваная ку выконанью тое прысегы, яко и поводовая ку прыслуханью се за моцъю того декрету нашого, до которого на болшую твердость и печать наша коронная прытиснена есть.
Писанъ у Варшаве року 1596 месяця октебра первого дня, а панованья королевствъ наших полского девятого а шведского третего року. Joan Tharnowski, vicecancell[arius]. Справа велебного в Бозе его милости ксендза Яна Тарновского, краковского, влоцлавского и ленчицкого пробоща, подканцлерого коронного. Florian Oleszko.
Записі В. кн. 11, л. 95.
Примітки
Подається за виданням: Грушевський М.С. Твори у 50-и томах. – Львів: Світ, 2004 р., т. 6, с. 317 – 318.