5. Рішення королівського асесорського суду в справі Лавріна Лозки з чернцями Микольського Пустинського монастиря про речі по неб[іжчику] Григорію Лободі, нібито сховані тими чернцями. 19 вересня 1596 р.

Михайло Грушевський

Декрет меж Лозкою жолнеромъ а меж игуменомъ манастыра Миколского пустынского Михайломъ Зарецкимъ и всѣми чернцами.

Жикгимонт третий.

Ознаймуемъ тымъ листомъ нашим всимъ вобецъ и кождому зособна нинешнимъ и на потомъ будучимъ, ижъ кгды приточиласе перед насъ и суд нашъ асесорский справа с позву задворного межи инстикгаторомъ нашимъ за деляцыею урожоного Лаврина Лозки жолнера нашого яко поводомъ – з одное, а межи игуменомъ манастыра Миколского Пустынского Михайломъ Зарецкимъ и всими чернцами менованого манастыра Миколского яко позваными – з другое стороны, о то иж будучи упомнеными мандатомъ нашимъ преречоные позваные, абы вшелякие добра лежачие и рухомые по Григорью Лободе козаку, яко по зрайци нашомъ, от вас деляторови тое справы отданые, были ему пусчены и зуполне отданы, которых то речей по Лободе позваные верху речоные не признавали и о нияких у себе быти не поведили, зачимъ на две тисечи грошей делятор тое справы положивши, позвалъ их о то ку праву, – на року теды нынешнемъ за тымъ позвомъ припаломъ и до того часу стегаючомъ се дня нинешнего месяца сентебра девятогонадцат, кгды обе стороне на першомъ приволаню, не ждучи водле права волынского третего дня, озвавши се, напервей сторона поводовая – инстикгаторъ нашъ и деляторъ урожоный Лаврин Лозка доводечи на игумена и чернцовъ миколских, ижъ при нихъ речи Лободины зостали, показалъ листь урожоного Якуба Претвича кашталяна каменецкого, в которомъ пишет, ижъ он слышалъ же яко бы при них речи Лободины зостат мели.

Противко тему сторона позваная чернци миколские Иона Чернобылецъ и Варламей сами от себе и именемъ игумена своего и всих чернцовъ боронечисе, же жадных речей Лободиных не брали ани о них ведали и в них не скорыстили, бралисе ку отводу и просили, абы им присега наказана была. А такъ суд нашъ асесорский прислухавшисе добре споромъ обое стороны, бачечи с права посполитого, же в речах вонтпливых близший завжды обвиненый ку отводу бывает, про то менованых чернцовъ ку отводу в той справе припустивши, присегнути само-третему игумену з двома чернцами наказалъ на томъ, яко жадныхъ речей Лободиных не брали, в себе их не мели, в манастыре не ховали и в них не скорыстили.

Которую присегу сторона позваныя повинни будуть выконати от даты сего декрету нашого за шесть недель на рочкахъ кгродскихъ киевских, которые напервей по выштью тое шести недель сужоны будуть, и тамъ уже обоя сторона рокъ певный и завитый мети будуть, такъ позваная ку выконаню тое присеги, яко и поводовая ку прислуханю се, за моцю того декрету нашого, до которого и печать наша коронная притиснена есть.

Писан у Варшаве лет. Бож. нарож. 1596 месяца сентебра 19 дня, а панованя кролевствъ нашихъ полского девятого, а шведского року третего. Joan Thamawsky r[egni] P[oloniae] vicecancell[arius]. Справа велебного Яна Тарнавского, краковского, иновлоцлавского и ленчицкого пробосча, подканцлерого коронного. Florian Oleszko.

Записі В. кн. 11, л. 93.

Примітки

Подається за виданням: Грушевський М.С. Твори у 50-и томах. – Львів: Світ, 2004 р., т. 6, с. 314 – 315.