Початкова сторінка

Михайло Грушевський

Енциклопедія життя і творчості

?

4. Королівський асесорський суд відкладає справу кн[язя] Януша Острозького з кн[язем] Кириком Ружинським, про те, що Ружинський, бувши черкаським і канівським підстаростою, покинув замки, затративши дві гармати. 8 липня 1596 р.

Михайло Грушевський

Декрет меж кашталяном краковским а княземъ Кирикомъ Ружинскимъ.

Жыкгимонт третий, Божю милостю.

Ознаймуемъ тымъ листомъ нашимъ всимъ вобецъ и кождому зособна, кому того ведати належытъ, ижъ кгды прыточила се передъ нас и судъ нашъ нинешний задворный справа с позву задворного межы инстыкгаторомъ нашимъ за деляциею ясневелможного Януша княжати Острозского, кашталяна краковского, старосты черкаского, каневского, белоцерковского и богуславского яко поводами – з одное, а межы урожонымъ княземъ Кирикомъ Ружынскимъ яко позванымъ – з другое стороны о то, иж недавнего часу будучы дей позваный подстаростимъ черкаскимъ и каневскимъ и отобравшы под певным инвентаромъ и реестромъ речы замковые, зъехалъ зъ замку, речей замковых такъ, яко их был отобралъ до верныхъ рукъ, не отдалъ, а меновите две дела с Канева не ведати где ся за уряду преречоного позваного подели, которых то речей неотдане инстикгатор нашъ з деляторомъ немалою сумою ошацовавшы, преречоного князя Ружинского ку праву притягнули, – теды на року нинешнемъ месяца июля осмого дня року деветдесятъ шостого, кгды ся справы судовые задворные оправовали, умоцованый деляторов шляхетный Янъ Пулковский, попираючы жалобы, через возного двору нашого Крыштофа Чижевского, сторону позваную по тры дни ку праву прыволывать давалъ.

На третемъ дню яко на завитомъ умоцованый от стороны позваное шляхетный Шымон Витнский озвавшы се, домавялсе, абы умоцованый деляторовъ напрод пры пленипотенцыи своей ведле права волынского оселост свою показалъ; которое иж не указал, Витунский просилъ водности от речы позву и року. А теж суд нашъ асесорский, заховуючисе водлугь права посполитого, поневаж Полковский при умоцованю оселости своее не показалъ, с тых прычинъ князя Ружинского позваного от року и позву нинешнего волным учинил, а инстыкгаторови нашому волное и цалое право зоставилъ моцю того декрету нашого, до которого на болшую твердость и печать наша короннаа прытиснена есть.

Писань у Варшаве лет. Бож. нарож. 1596 месяца июля осмого дня, а панованья королевствъ наших полского девятого, а шведского третего року. Joanes Tharnowsky, r[egni] P[oloniae] vicecancell[arius]. Справа велебного в Бозе его милости ксендза Яна Тарновского, краковского, влоцлавского и ленчицкого пробоща, подканцлера коронного. Flor[ian] Oliessko pisarz.

Записі В. кн. 11, л. 83.


Примітки

Подається за виданням: Грушевський М.С. Твори у 50-и томах. – Львів: Світ, 2004 р., т. 6, с. 313 – 314.