12. Королівський асесорський суд засуджує войського київського Семена Бутовича, аби виплатив 2000 коп за речі Григорія Лободи Л[авріну] Лозці. 7 жовтня 1596 p.

Михайло Грушевський

Декретъ меж Лавриномъ Лозкою а межъ Семеномъ Бутовичомъ войскимъ киевскимъ.

Жикгимонтъ третий.

Ознаймуемъ тымъ листомъ нашымъ всѣмъ вобецъ и кождому зособна, кому того ведати належить, иж кгды приточиласе перед нас и суд нашъ нинешний асесорский справа с позву задворного межы инстыкгаторомъ нашымъ за деляцыею урожоного Лаврина Лозки жолнера нашого яко поводомъ з одное а меж урожонымъ Семеномъ Бутовичомъ войскимъ киевскимъ яко позванымъ з другое стороны о то, иж нинешний позваный будучи дей упомненый о добра прехованые у себе ниякого Григорья Лободы козака зрайцы нашого и речы посполитое, абы оные яко сумы пенежные и речы рухомые также на долгахъ листами уищоные преречоному Лозце яко донаторови отдалъ и во всем ся уистилъ, чого иж позваный не услухал и таковых речей отдати не хотѣль, инстыкгатор нашъ з деляторомъ на две тисечи копъ литовскихъ таковые речы ошацовавши, шкоды засе также много за то положили, и о то все ку справедливеню се нинешнего Бутовича позвали, – на року теды нинешнемъ за тымъ позвомъ припаломъ и до того часу стегаючомся месяца октебра семого дня року деветдесят шостого кгды ся справы судовые задворные порядкомъ своимъ звыклымъ отправовали, инстыкгаторъ нашъ з деляторомъ тое справы вышъ речоное, давши по три дни сторону позваную Семена Бутовича до суду приволати, леч иж се преречоный Бутовичъ на першумъ дню и на остатнемъ третемъ яко на завитомъ не озвалсе и никоторое ведомости о себе судови и стороне своей противной знати не далъ, теды инстыкгаторъ нашъ з деляторомъ, доведши в той справе положеня позву реляцыею возного, преречоного Бутовича в нестанномъ яко права непослушного на упадъ во всемъ, о што позван был, в зыску здалъ и домовялсе, абы за речы Лободины при позваномъ осталые две тисечи копъ грошей литовских, засе особно за шкоды также две тисечи копъ ведле позву на маетности позваного и на особе его всказани были.

А такъ судъ нашъ асесорский, заховуючися водле права посполитого, преречоного Семена Бутовича, яко непослушного права посполитого, здати на упадъ во всемъ томъ, о што былъ позванъ, допустивши, суму пенезей в позве описаную чотыри тисечи копъ грошей литовскихъ на маетности его, а в недостатку маетности и на особе его всказал и присудилъ тымъ декретомъ нашимъ, и тую всю справу со всѣмъ ее скуткомъ до вряду и староства належного, в которых бы добра преречоного позваного были, на отправу и екзекуцию порядкомъ статутовым ведле конституции о отправахъ речей осужоныхъ написаное, и под винами на врадниковъ недбалых, в праве и в конституцыи описаном, отослалъ моцею того декрету нашого; до которого на болшую твердость и печать нашу коронную притиснути есмо казали.

Писанъ у Варшаве лѣта Божого нароженья тисеча пятсот деветдесят шостого месяца октебра семого дня, а панованя кролевствъ нашихъ поленого девятого, а шведского року третего. Joan Tharnowsky r[egni] P[oloniae] vicecancell[arius]. Справа велебного в Бозе его милости ксендза Яна Тарновского, краковского, влоцлавского и ленчицкого пробосча, подканцлерого коронного. Florian Oleszko.

Записі В. кн. 11, л. 104.

Примітки

Подається за виданням: Грушевський М.С. Твори у 50-и томах. – Львів: Світ, 2004 р., т. 6, с. 322 – 324.