Початкова сторінка

Михайло Грушевський

Енциклопедія життя і творчості

?

8. Рішення королівського асесорсъкого суду в справі Еразма Коморовського з міщанами черкаськими Радком і Шаулою про конфісковане майно козака Шаули. 7 жовтня 1596 p.

Михайло Грушевський

Декреть меж Коморовским а Радкомъ и Шаулою мещаны черкаскими.

Жикгимонт третий.

Ознаймуемы тым листом нашим кождому, кому бы то вѣдати належало, иж кгды приточиласе перед нас и судъ нинешный асесорский справа с позву задворного межи инстыкгатором нашимъ за деляциею урожоного Еразма Коморовского жолнера нашого яко поводомъ з одное а меж славетным Радком Городчанином и Васильемъ Шаулою мещаны черкаскими поддаными нашими яко позваными – з другое стороны, о то иж позваные нинешные будучи упомнены о добра ниякого Шаулы козака здрайцы речи посполитое и нашого, аби поводови нинешнему таковые добра отдали, о чом ширей и достаточней в позве тое справы описано и доложоно есть, – на року теды нинешнем месяца октебра семого дня в року деветдесят шостомъ кгды се справы судовые задворные порядком своимъ звыклом отправовали, инстыкгаторъ нашъ з деляторомъ тое справы вышей реченое, давши по три дни сторону позваную мещан черкаских через возного двору нашого Крыштофа Чижевского до суду приволат, иж се пререченые мещаны черкаские так на першом дню и на остатнем яко завитом не озвалисе и никоторое ведомости о собе судови и стороне своей противной знати не дали, за которым нестанемъ и непослушенствомъ инстыкгаторъ нашъ з делятором на упадь в нестаном их здавши, домовилсе, абы сума пенезей чотыри тисечи копъ литовских, в позве описаная, на них всказана была.

А так суд нашъ асесорский, заховуючися водлугь права посполитого, мещан преречоныхъ Радка и Шаулу яко непослушныхъ здати на упадъ во всем том, о што позвани были допустивши, суму пенезей в позве описаную чотыри тисечи копъ грошей литовских на особахъ и на маетностях всказалъ и присудилъ тымъ декретомъ нашимъ и тую справу зовсѣм ея скутком до вряду и староства належного, в которых бы добра якие тых позваных показали, на отправу екзекуцию порядком статутовым отослал, до которое речы на болшую твердость печать наша коронная притиснена есть.

Писан у Варшаве лѣта Божого нароженья тисеча пятсот деветдесят шостого месеца октебра семого дня, а панованя кролевствъ нашихъ полского девятого а шведского третего року. Joan Tharnowsky r[egni] P[oloniae] vicecancell[arius]. Справа велебного в Бозе его милости ксендза Яна Тарновского, краковского, влоцлавского и ленчицкого пробосча, подканцлерого коронного. Florian Oleszko.

Записі В. кн. 11, л. 96 v.


Примітки

Подається за виданням: Грушевський М.С. Твори у 50-и томах. – Львів: Світ, 2004 р., т. 6, с. 318 – 319.