Початкова сторінка

Михайло Грушевський

Енциклопедія життя і творчості

?

2. Кор[оль] Жигимонт посвідчив, що кн[язь] Константин Острозький постачив свідоцтв про спустошення його волинських маєтностей татарами і козаками, і відкладав справу його київських маєтностей. 2 лютого 1596 р.

Михайло Грушевський

Декрет знесеня винъ с княжати его милости пана воеводы киевского за учинене досит побору с певных мест при(се)гами [Тут і нижче надірвано картку скраю.] подданых своих на спустошенью ихъ.

Жикгимонт третий.

Ознаймуем тым листомъ нашим всихъ посполите и каждому зособна нинешнимъ и напотомъ будучим, иж з декрету нашого судового в Кракове, в року теперь минуломъ деветдесят пятомъ месеца октебра третегонадцать дня учиненом, кгды дня второго месеца февраля в пятницу в року нинешнем деветдесять шостомъ припал рокъ перед нас и суд наш господарьский ясневелможному Костентину княжати Острозскому, воеводе киевскому, маршалку земли Волынское, старосте володимерскому, до указаня и выведеня се перед нами и судом нашым, учинилъ ли досыть тому декретови нашому з стороны ставеня войтов и атаманов ку присязе на рочках в Кремянцу з мест своих, то есть Костентинова, Любартова, Острополя, Кузмина, Красилова и з селъ до тыхъ месть прислухаючих, въ воеводстве Волынскомъ лежачих, яко от Татаров тые маетности попалены и от Козаков попустошены, для чого побор в року деветдесят третем не ест з них выдан, так засе до плаченя побору и чопового з маетностей непопустошоных и с которых бы атаманове прислати не хотели, яко о томъ ширей и достаточней в декрете том нашом описано и доложено было, – теды на року нинешнемъ з выроку нашого припалом умоцованый княжати его милости шляхетный Мартинъ Грабковичъ, у суду нашого постановившысе, а выводечи досыт учинене декретови нашому, показал квит скарбу нашого коронного под печатю скарбовою и с подписом руки подскарбего нашого надворного, в котором ясне и достаточне описано было, иж с помененых мест Костентинова, Любартова, Острополя, Кузмина и Красилова бурмистров, людей присяглых, а з селъ семдесят атаманов в Кремянцу на рочках ку присязе ставил и присяги их на попаленю тыхъ маетностей от Татарына и спустошеныю от Козаков сознане вряду кгродского кремянецкого в скарбе нашом коронном указовалъ.

(З)а которимъ таковымъ досыть учиненемъ декретови нашому скарбъ нашъ преречоные мѣста княжати его милости от даваня побору и чопового вольным учинил, якож и мы задосыт учиненье то принемши, с того даваня побору и чопового, в року деветдесят третем уфаленого, и з вин в декрете описаных, под которые вже затым подпадати не может, также зо всего переводу права кгродского кремянецкого, от вин з заруками всказаных велможного воеводу киевского волным чинимо на вечные часы.

А што се дотычет з ынших мест княжати его милости непопустошоных и з ласки Божое от Татарына не попаленых въ воеводстве Киевскомъ, а не у Волынскомъ лежачих, то есть з места Киева, з Белогородки и Вилска, яко то в декларации соймовой (вільне місце) Витовский поборца и киевский далъ знать, и самъ княжа его милость через умоцованого своего на оном же сойме прошломъ краковском перед депутатми, личбы с поборовъ слухаючими, призналъ, а на сес час ведле декрету нашого с тых месть побору и чопового до скарбу нашого не прислалъ и квитов, отдал ли з них до належного поборцы воеводства Киевского, яко в скарбе нашомъ справу давалъ, же отдал, умоцованый его не указал, и для того о узыченье часу далшого на показане тых квитовъ насъ просилъ.

А такъ мы господарь за тою прозбою до нас учиненою и абы тымъ порядне се то показало и отправило, дозволили есмо дыляцыи на показане таковых квитовъ по зачатю сойму близко пришлого у Варшаве ве две недѣли: на он час велможный воевода киевский повиненъ будетъ безъ жадное вымовки певную речь в скарбе нашом показати и досыт той дыляцыи яко на року завитом у суду нашого за квитом скарбовым учинити, наказуемы тымъ декретомъ нашымъ, до которого и печать наша коронныя ест прытиснена.

Писан в Кракове року тисеча пятсот деветдесят шостого месеца февраля второго дня, а панованя кролевствъ наших полского девятого а шведского второго року. Joan Thamowski, vicecancell[arius]. Справа велебного Яна Тарновского, краковского, влоцлавского и ленчицкого пробоща, подканцлерого коронного.

Записі В. кн. 11, л. 52.


Примітки

Подається за виданням: Грушевський М.С. Твори у 50-и томах. – Львів: Світ, 2004 р., т. 6, с. 310 – 312.