Початкова сторінка

Михайло Грушевський

Енциклопедія життя і творчості

?

4. Документи Дмитра Єльця 1465 – 1571 рр.

Михайло Грушевський

Шл[яхтич] Дмитр Єлець, зем’янин київський, продає своє селище Серяков коло Києва шл[яхтичу] Марку Поплавському десятнику київської залоги; при тім подано зміст документів на сю маєтність, почавши від надання р. 1465; у Києві 14 падолиста 1571 р.

«Сознаннє « того акту до книг гродських київських, у Києві, 15 падолиста 1571 р.

Кор[оль]Генрик потверджує той же акт за проханням М.Поплавського, в Варшаві, 18 марта 1572 p.

Жикгимонт Август, Бо(жо)ю мил(ост)ю корол полский, великий княз литовский, руский, пруский, мазовецкий, жомоитский, ифлянтский пан и дедич.

Ознаймуемы тымъ листомъ нашимъ, всим вобец и каждому зособна, кому того ведати належи, нинешнимъ и на потом будучимъ, иж указовалъ перед нами и перед паны радами нашими, на сойме теперешнемъ Варшавскомъ при насъ будучими, шляхетный Марко Поплавский, десятникъ з роты урожоного Каспора Стужинского, ротмистра нашого замку Киевского, лист – запись шляхетного Дмитра Федоровича Елца, земянина нашого повету Киевского, которым листомъ воимъ продалъ ему селищо свое властное отчизное обрубное, прозываемое Серяковъ, лежачое в повете Киевскомъ у двухъ миляхъ от Киева над рекою и обапол реки Котовки, за певную суму пенязей, на томъ листе его продажномъ описаную, якож дей тую продажу свою Дмитръ Елецъ, самъ обличъне ставши перед урядомъ нашимъ кгродскимъ Киевскимъ, оповедалъ и доброволне до книгъ кгродскихъ киевскихъ зозналъ, и тот листъ свой и продажу записати далъ, яко то все ширей а достаточъней тот листъ его продажный и выписъ книгъ кгродскихъ киевскихъ в собе описуеть и обмовляет, который слово од слова такъ ся в собе мает:

Выписъ книгъ кгродскихъ замъку господарского Киевского.

Лета Божего нароженя тисяч пят сот семдесят першого мѣсяца ноябра пятнадцатого дня, постановившыся обличъне на вряде его кролевское милости в замъку Киевскомъ перед нами Костентиномъ Острозкимъ, воеводою киевскимъ, маршалъкомъ земъли Волынское, старостою володимерскимъ, шляхетный пан Дмитръ Федоровичъ Елец оповедалъ и доброволне тыми словы до книгъ кгродских киевскихъ созналъ, иж продалъ селище свое властное отчизное Серяковъ за шестдесят копъ грошей литовъскихъ пану Марку Поплавскому, десятинику роты пана Каспора Стужинского, на што дей есмо и лист свой вызнаный под печатю своею и властного писаня руки своее, а под сведомом и печатми пановъ зацныхъ пану Марку Поплавскому дал, который листъ на вряде оказавши, просилъ, абы былъ вычытанъ и в книги кгродские записанъ, который такъ ся в собе маеть:

Я Дмитръ Федорович Елец вызнаваю и чиню явно симъ моимъ листомъ, кому то потреба ведати або чтучи его слышати, сес час и на потомъ будучимъ людемъ, иж я з доброе воли своее, ведаючы волность шляхетскую, у статуте на утле сойму Берейстейского описаную, иж кождому шляхтичу волно именями своими шафовати и кому хотячи отдати, продати, не смотречи третее части, але все уздоймомъ, – продалъ есми селищо свое властное отчизное обрубное, прозываемое Серяковъ, лежачое у повете Киевскомъ у дву миляхъ от Киева, над рекою и обапол реки Котовки. То есть грани того селища Серякова: напервей почавши от речки Котовки малою речкою Серяковскою уверхъ долины, где лесъ, и долина унелася, от тое долины валомъ и з ровомъ, аж до дороги великое, которая идет з места Киевского и манастыра Печерского до Королева мосту, тоюж дорогою поехавши и звернувши лугомъ до долины Глубокое, в которой долине и озеро стоить, а от того озера лугом до леска, который лесокъ и долина впала в речку Котовку, которое местцо зовется врочищомъ Козий Брод; тоюж речкою Котовкою до долины, которая зовется Куликовка, тоюж речкою переехавши въверхъ тою долиною, над которою долиною копъцовъ чотыри стародавныхъ, в которых копъцах значилася и знелася Гнилецкая и Лесницкая Семена Трещина. Тое селищо продалъ есми з дубровами, с полми, зъ сеножатми, с пасеками и з ставищомъ и зо всим на все, яко се тая земъля здавна сама в собе в пожиткохъ, уво входехъ, в широкостяхъ, и в границах своихъ верху менованыхъ мает, за певную суму пенязей, за шестдесят копъ грошей личбы и монеты литовское, личечи по десети пенязей белыхъ в грошъ, а в копу по шестдесят грошей, десятнику роты пана Каспора Стужинского пану Марку Поплавскому, жоне, детем, потомкомъ и счадкомъ его на веки исте. Которое селищо Серяковъ заразъ есми в моц и в держане подалъ: мает пан Марко Попълавский самъ, жона, дети, потомки и щадки его тое селищо Сераковъ держати, вживати, розширяти, розмножати и собе з него якие хотечи пожитки привлащати, маючи волност тое селищо менованое Серяков кому хотечи отдати, даровати, продати, заставити, заменити и куды хотя ку своему лепшому пожитку обернути, а я Дмитръ Елец сам, жона моя, дети, потомки, щадки, кревные, близкие, повинные мои и нихто з брати моее в тое селищо Серяковъ ничим ся въступовать и жадное переказы и трудности пану Марку Поплавскому чинити не маемъ; а естли быхъ я самъ, жона, дети, потомки, близкие, повинные мои, або брат мой панъ Федоръ в тое селищо Серяковъ чимъ се колвекъ въступовать, якуюж колвекъ трудность пану Марку Поплавскому або потомъкомъ его чинити мели, тогды кождый таковый з насъ, хто бы то смелъ учинити, мает и будет повиненъ заруки господару королю его милости шестдесят копъ грошей, а пану Марку Поплавскому, яко стороне нарушоной, другую шестдесят копъ грошей заплатити, шкоды и накълады нагородити, а заплативши заруку, а за шъкоды и накълады нагородивши, предсе сес мой листъ, яко продажный, в кождого права и на всякомъ местцу при моцы зостати, держанъ и захованъ быти мает. А хотяж бы брат мой пан Федор Елец хотелъ о тое селищо Серяковъ пана Марка Поплавского позва(ти), тогды я в кождого права буду повинен пана Поплавского заступова(ти), якож и листы твердости, право свое, которое есми мелъ на тое селищо Серяков, пану Марку Поплавскому до рукъ далъ, перший листъ князя Семена Александровича, под датою лѣта семое тисечи девет сот семдесят третего мѣсяца марта, индикта третего-надцат, иж его милость князь Семенъ Александровичъ слузе своему князю Ю(ри)ю Борисовичу тое селищо Серяков далъ; ку тому листъ князя Ю(ри)я Борисовича под датою осмое тисечи, индикта четвертого, мѣсяца августа, иж князь Юрей Борисовичъ тое селище, выслугу свою, пану Ивану Игнатовичу Елцу продалъ; при том теж листъ пана Андрея Якубовича Немировича, воеводы киевского, гетмана господарского, под печатю его милости, в котором дата стоит индикта осмого [Себто року 1535.] мѣсяца февраля четвертого-надцать дня, што пан Яцко а пан Федор Ивановичи Елцы, ставши очевисто перед его милостю паномъ Андреем Немировичомъ, то сознали, же межи собою разделъ вечъный приняли, – и на томъ я Дмитръ Елец пану Марку Поплавскому далъ сесь мой продажный листъ з моею печатю и властного писаня руки моее, а для лепшего сведомя на кшъталтъ тоеж руки моее и еще-м руку свою подписалъ. А при том были и того добре сведоми ест, а за устною и очевистою прозбою моею и печати свои приложа(ти) рачили къ сему моему листу ихъ милость панове зацные: панъ Станиславъ Силницкий, пан Каспор Стужинский войский и ротмистръ его кр. милости замку Киевского, а панъ Богушъ Гулкевичъ Глебовский, писар кгродский киевский. Писанъ у Киеве лѣта Бож. нароженя тисеча пят сот семъдесят первого мѣсяца ноябра четвертогонадцат дня.

А такъ мы тое оповедане а доброволное и очевистое сознане пана Дмитра Елца и листъ его продажный слово от слова с початку все до конца в книги кгродский киевскии записати казали и выписъ книгъ под печатю нашою пану Марку Поплавскому на то дати велели. Писанъ у Киеве.

И билъ намъ чоломъ преречоный Марко Поплавский, абыхмо тот листъ Дмитра Елца продажный водлугъ права умоцнивши, до книгъ нашихъ канцлярских коронныхъ въписати казали. А такъ мы, видячи то быт речъ слушную и обачивши тот листъ продажный Дмитра Елца, добрый, порадный, слушный и ни в чомъ не нарушоний, и печати целые того листу и тыхъ всихъ, которые до него приложили, водлугъ права посполитого и статуту земского справеный и учиненый и обличъне через помененего Дмитра Елца на вряде нашомъ кгродском Киевском оповеданый и зознаный, тот листъ продажний, вышей в томъ нашомъ листе описаный, ни в чомъ его не нарушаючы, вцале и в моцы зоставуемы, а моцю зверхности нашое господарское потвержаем и умоцняемъ тымъ нашимъ листомъ: мает Марко Поплавский, он самъ, жона, дети и потомъкове его тое селищо зо всимъ, яко на листе продажномъ въ границахъ своих описано, зо всими приналежачими до него пожитки держати, уживати вечными часы. Што все з росказаня нашого до книгь нашихъ канцлярейских коронныхъ записано есть, а на свядецтво и добрую ведомост того всего вышей писаного и печат нашу коронную до того листу нашого притиснути есмо велели. Данъ въ Варшаве дня осмого-надцать мѣсяца марца року от нароженя Сына Божего тисеча пят сот семдесят второго, а панованя нашего сорокъ третего. Valenty Dembinsky, г. P. cancell.

Коронна метрика Московського архіву Міністерства справедливості, І В., кн. № 2, f. 123.


Примітки

Подається за виданням: Грушевський М.С. Твори у 50-и томах. – Львів: Світ, 2003. – т. 5, с. 122 – 126.