1. Грамота кн. Олелька для Ларивона Велавського, 1450 р.

Михайло Грушевський

Кн[язь] Олелько київський увільняє слугу свого Ларивона Велавського від податків і робіт та потверджує його в стані боярськім, в Овручі, 19 лютого 1450 р.

В[еликий] кн[язь] Казимир затверджує за зем’янином Булгаком Бе-лавським (lege: Велавським) землю Смольчанську на основі листу воєводи київського Мартина Ґаштовта, в Троках, 3 марта 1486 p.

Кор[оль] Генріх затверджує за зем’янами: Павлом та Семеном Булгаковськими, Гридком Нелеповичем-Левковичем та Родивоном і Охрімом Геєвськими землі Левковську, Ловдиковську та острів Литовський, увільняючи їх на підставі грамоти кор[оля] Жиґимонта Августа від овруцького замкового присуду; в Кракові, 18 марта 1574 p.

«Генрыкъ, Бо(жо)ю мил(ост)ю корол полски.

Ознаймуемы тымъ листомъ нашимъ всимъ вобец и каждому з особна, кому того ведати належит, нинешнимъ и на потомъ будучим, ижъ указовали перед нами земяне наши Киевского повету на имя Павел а Семен Ивановичи Болгако(в)ские, Гридко Нелепович Аевкович, Радивон а Охрем Геевичы зъ братею своею листъ славное, памети князя Александра Володимеровича киевского, который листом своимь продка ихъ Ларивона Валевского, с которого онъ (sic!) поколеня вышли, вызволити рачилъ от всяких робот и повинностей, а зоставит ихъ рачил на службе шляхетской, а другий листь – потвержене славное памети Казимера короля его мл., продка нашого, которы(м) листомъ своимъ Казимир кр. его мл. прадеду ихъ, земянину овруцкому, на имя Булгаку Белавскому потвердит рачил землю их отчизную на имя Смолчанскую водлугъ листу на он часъ воеводы киевского пана Мартина Кгаштолта, яко то на тыхъ листехъ ширей описано естъ, которые слово от слова такъ ся в собе мають:

Мы Александро Володимеровичъ пожаловали есмо н(а) то(го) слугу Ларивона Вела(в)ского: не надобе ему нам з слугами службы служити а поплатовъ платити и иных никоторыхъ пошлин в Чорнобыли не велели: подвода(ми), ни стеречи, служити ему служба з бояры. И на то дали есмо ему се(с) нашъ листь з нашою печатю, потверджаючи ею к бояромъ. И писан у Вовручомъ февраля девятогонадцят дня индикъта третегонадцять.

Самъ Казимир, Бо(жо)ю милостю корол полский, великий князь литовский, руский, княжя пруское, жомоитский и иныхъ.

Наместнику Вовруцкому пану Роману Ивашкевичу.

Билъ намъ чоломъ земянин въруцкий на имя Булгакъ Белавский и поведилъ намъ, штожъ земля его отчизная на имя Смолчанская от него была прочь отышла. И как небожчикъ пан Мартинъ Кгаштолтович Киев от нас держалъ, и о томъ доведавши се и права досмотревши и свѣтковъ опытавши, тую землю ему даль. И листъ пана Мартинов на тую земълю перед нами клалъ и просил нас, абыхмо тую землю ему потвердили нашимъ листом. И мы пана Мартинова листу выслухавши и тую земълю ему потвержаемъ симъ нашимъ листомъ, нехай он тую землю держит и намъ с того служить по тому, якъ перво того с тое земли служба шла. Писан в Троцехъ мца марца третего дня индикъта четвертого.

Ку тому теж поведели перед нами преречоные земяне наши киевские, иж властную отчизную землю свою названую Ле(в)ко(в)скую, Ло(в)дико(в)скую и остров Ли(тов)ский з давныхъ часов од продковъ своихъ держать и спокойне от колкодесят леть з братею своею уживают, и службу нашу земскую воєнную заровно з иншими земяны шляхтою киевскою завжды служивали, будучи под присудомъ суду киевского такъ земского яко и кгродского, а тепер дей имъ некоторые земяне киевские в томъ трудност задають, притягаючи ихъ до суду имъ не належного, перед державцу овруцкого, ку великой кривде и уближеню волностей ихъ. И показовали перед нами листы славное памети короля его милости Жикгимонта Августа, до державец овруцкихъ писаные, абы их под присуд свой до замку Овруцкого не примушалъ, але жебы се перед судом Киевскимъ водлугъ здавна звыклого обычаю судили заровно з ыною шляхтою киевскую (sic). И били нам чоломъ помененые земяне наши киевские, абыхмо их при волностях шляхетскихъ, од продков наших имъ наданых, также теж и при тых именяхъ ихъ отчизных, земляхъ названых, то есть земли Смолчинской, земъли Ле(в)ко(в)ской, земъли Ловдик(ов)ской и острове Ли(тов)скомъ, которихъ они од предков своих з вечныхъ часовъ в держаню и уживаню сут, зоставивши то им, листомъ привилеемъ нашимъ на вечност потвердити велели, якож и воевода киевский велможный Константын княжа Острозкое, будучи овде при нас на коронацыи нашой, за ними ся причинял, поведаючи, иж они здавна заровно зъ шляхтою воеводства Киевского службу земъскую военную служивали и о всякие речи перед судомъ земъскимъ и кгродскимъ киевскимъ справовали се.

Мы теды, взявши в томъ певную ведомость от воеводы киевского и от иных панов радных коронныхъ, видечи того быть речь слушную, вырозумевши и обачивши то з листов продковъ нашихъ, ижъ они здавна суть земяне шляхта повету Киевского, з ласки нашое г(оспо)д(ар)ское за радою и причиною панов рад нашихъ коронныхъ, на томъ сойме коронацыи нашое при насъ будучихъ, преречоныхъ земянъ киевскихъ з братею и потомъствомъ ихъ при вшелякихъ волностяхъ и свободах шляхетскихъ, здавна од продковъ нашихъ шляхъте киевское наданых и при унией, албо злученю великого князства Литовского и князства Киевского с короною Полскою, за панованя славное памети Жикгимонта Августа, короля его милости, поприсежоных и упривилееваных, так теж и при тыхъ именяхъ и земъляхъ ихъ отчызныхъ вышей мененыхъ, которыхъ они з давных часовъ в держаню и уживаню суть, зоставили есмо, якож и тымъ нинешним листомъ нашимъ зоставуемы и потвержаемы на вечность; такъ ижъ пререченые земяне киевские з братею своею, такъ вси споломъ, яко и кождый зособна, дети и потомкове ихъ помененые земли свое(и) отчизные, то есть земълю Смолчинскую, Ле(в)ковскую, Ло(в)дико(в)скую и остров Лито(в)ский зо всими пожитки и доходы такъ, яко се тые земъли здавна сами в собе в пожиткохъ, обыходехъ и в шерокости кгрунтовъ мают, з лесами, реками, озеры, з сеножатми, з ловы рыбными и зверинними, з бобровыми гоны, мають держати и всякихъ свобод и волностей шляхетскихъ, од продковъ наших князства Киевского обывателе[м] наданых, упривилееваных, поприсежоныхъ и статутомъ описаныхъ, уживати и в них ся веселити сполом ровно зо всими обывателми шляхтою земъли Киевское на вечъные часы, служачи нам господару и речи посполитое службу земъскую военную. Такъ теж во всякихъ речахъ и справахъ своихъ перед судомъ земскимъ албо кгродскимъ киевскимъ справовати се мають, а перед судомъ имъ не належнымъ, яко перед урядомъ замъку Овруцкого и нигде инде не повинни становити ся и справовати се, окримъ еслибы роки земские судовые албо кгродские тамъ в замъку Овруцкомъ зъ зезволеня всихъ обывателей албо з росказаня нашего были сужоны. И на то есмо преречонымъ земяномъ нашимъ киевскимъ, бра(т)и и потомкомъ ихъ дали тоть нашъ листь, до которого на сведецтво и печать нашу коронную привесити есмо росказали. Дань в Кракове дня осмогонадцать марца мѣсяца року от нароженя Сына Бож. тысеча пят соть семдесят четвертого, а панованя нашего року першого, при бытности панов рад нашихъ коронныхъ и великого князтва Литовскаго, духовныхъ и свецкихъ, а пословъ земскихъ, на сойме сполномъ коронацыи нашое при насъ будучих. Дан через руки велможного Валентого Дембинского з Дебянъ, канцлера короны Полское, старосты ва(р)те(н)ского.

Коронна метрика Московського архіву Міністерства справедливості, І В., кн. № 2, f. 167.

Примітки

Подається за виданням: Грушевський М.С. Твори у 50-и томах. – Львів: Світ, 2003. – т. 5, с. 114 – 117.