14. Кормильче, 1410 р.

Михайло Грушевський

Ягайло надає Грицьку Кердеєвичу с. Кормильче і Ходиківці в Камінецькім повіті, 26 марта 1410 p.

In nomine Domini. Amen. Ad perpetuam rei memoriam.

Cum inter humanae nature commoda nichil dignius memoria habeatur, oportunum existit, ut actus hominum literarum apicibus et testium annotacione perhennentur, ne lapsu temporis evanescant. Proinde nos Wladislaus, Dei gracia rex Poloniae necnon terrarum Cracovie, Sandomirie, Siradie, Lanczicie, Cuiavie, Lithvanie princeps supremus, Pomeranie dominus et heres Russie etс. significamus tenore praesentium, quibus expedit universis, quomodo attendentes pure fidei constanciam et constantis fidelitatis insignia, quibus Ryczko Kyrdeyowicz erga nostram se exercuit utilitatem, et adhuc aucto fidelitatis studio prestantius poterit exercere in futurum, horum intuitu volentes ipsum gratiarum nostrarum prosequi favoribus et ad obsequia nostra continuo reddere prompciorem, sibi villas nostras Kormylcze, Chodykowcze, in terra Podolie et districtu Camenecensi sitas, cum omnibus ipsarum iuribus, utilitatibus, fructibus, censibus, proventibus, redditibus, videlicet agris, campis, pascuis, silvis, nemoribus, borris, rubetis, virgultis, mellificiis, aucupacionibus, venacionibus, fluviis, piscinis, lacubus, stagnis, aquis et aquarum decursibus, molendinis et eorum emolumentis, necnon dominiis, proprietalibus, attinentiis, pertinentiis et appendiis universis, quomodolibet ad ipsas spectantibus ab antiquo, prout in suis metis longe, late et circumferentialiter limitate sunt et distinctae, damus, donamus et conferrimus et largimur donatione perpetua et in ewum per ipsum et ipsius successores legitimos habendum, tenendum, utifruendum et pacifice possidendum necnon donandum, alienandum, commutandum et vendendum de nostra et nostrorum successorum voluntate et consensu speciali, hoc tamen adiecto et specialiter expresso, quod idem Ryczko et sui successores propter deffectum hominum in terra Podoliae residentiam faciant personalem, ad singulas expeditiones nostras nobis et successoribus nostris cum duabus lanceis et sex sagittaris obsequi tenebuntur servire, – harum, quibus sigillum nostrum est appensum, testimonio literarum.

Actum et datum in Lamburga, feria quarta proxima post diem festi dive pasce anno Domini millesimo quadringentesimo decimo, praesentibus his validis et nobilibus dominis: Ioanne de Złoczow lublinensi, Floriano de Korythnycza viszlicensi et capithaneo Russie, Vincentio de Granow naklensi, Iohane Kuropatwa zawychostensi – castellanis, Nicolao de Kulikow, Iohane Klusz, Wolczkone Przyszluczycz et Iohane Mazovita aliisque pluribus fidelibus nostris dilectis. Datum per manus venerabilis Nicolai, praepositi sancti Floriani ante Cracoviam, regni nostri Polonie vicecancellarii, nobis sincere dilecti. Relatio eiusdem domini Nicolai praepositi sancti Floriani, vicecancellarii.

Київського центрального архіву кн. 3599, л. 82.

Примітки

…Ходиківці в Камінецькім повіті – тепер с. Чемеровецького р-ну Хмельницької обл. (Крикун М. Кількість та структура поселень. – С. 444).

Подається за виданням: Грушевський М.С. Твори у 50-и томах. – Львів: Світ, 2005 р., т. 7, с. 156 – 157.