Початкова сторінка

Михайло Грушевський

Енциклопедія життя і творчості

?

4. Митрополит Михайло Рогоза дає дозвіл на заснування братства в м.Любліні, 28 червня 1594 p.

Михайло Грушевський

Кор[оль] Жигимонт [Ш] потверджує сю грамоту, 24 квітня 1596 р.

Конъфирмацыя брацства мещаном Любелъскимъ релии греческое.

Confirmatia bractwa miesczan Lubelskich religiey greckiey.

Жикгимонт третий etc.

Ознаймуемъ тымъ листом нашимъ всим вобецъ и кождому з особна, которим того ведати належить, нинешнимъ и напотом будучимъ. Покладали перед нами мещане Любелские, подданые нами, вери греческое, на име Дмитръ Стативчичъ, Леонтий Опанасович а Андрей Лукъянович, сами от себе и от всего братства подавцовъ церкви Преображенья Господня Спаса нашого Исусъ Христа, з кгрунтами ее, стоячой на горе, при гостинцу, в Люблине, листь на паракгамине писаный от велебного Миха(и)ла митрополита киевского и галицкого и всея Руси, собе на братство духовное по обычаю братства в ыныхъ церквахъ маючих наданое, яко о том ширей и достаточней в томъ листе братства принятого преречоных мещан Дюбелcкихъ описано и доложено есть, и били нам чолом тые то мещане, подданые наши, абыхмо им таковое братство листом нашим потвердили и до книг канцелярии нашое лист митрополий вписати казали; которого мы огледавши и читаного вислухавши, до книгь канцлерии нашое и в сес листь нашъ вписати есмо велили, и такъ се в собе слово в слово мает:

Мы смиренъный Михаилъ Рагоза, аръхиепископъ, митрополит киевский и галицкий и всея Руси, будучи намъ на тот час на зъезде нашомъ духовном водлуг уфалы и постановенья нашого на ден уреченный рожества светого пророка и предотечи крестителя Господня Иоана во благоспасаемомъ граде места господарского Берестейского, при бытности их мл. честных епископовъ, аръхимандритовъ, игуменовъ и немало свещенического чину по имени их в року теперешнем тисеча пят сот девятьдесятъ четвертом, ознаймуем и возвещаемъ всим благочестивым православья закону нашого светого греческого о том, иж молиша нас свещенный ерей Сава Петровичъ, сослужитель церкви Преображенья Господня Бога и Спаса нашого Исусъ Христа и при нимь благочестивые и христолюбивые граждане места господарскаго Любелского, сыны по духу послушные зверхности пастырства нашого епархии епископии Холъмское, благословитисе им от нашого смирения прияти чин братства светого светейшим патриярхом кир Иеремеемъ даного по чину братства духовного Львовского храму Успения светыя Богородица, а Виленского храму светое живоначалное Тройцы, также и Берестейского храму светого чудотворца Христова Николы соборнее церкви.

И о семъ молиша нас мещане релии закону светого греческого, жебы смы имъ яко парафияномъ церкви тамошное любелское светого Спаса Преображения Господня мет позволили в заведане и опатренье их тую церков зо всими кгрунтами и пожитками, то(и) церкви Любелско(и) належачими на выхованье свещенъника их; которие то братя, где бы ся от когож колвекъ якие кривди в добрах церковных деяли, мают боронити и заступовати водле правъ наданых той церкви и артикулов в порадках братских описаных заховати ся мають.

Што мы аръхиепископъ сполечне из их мл. епископы на тоть час при мене будучими, а меновите при бытности его мл. отца кир Ипатея, епископа володимерского и берестейского, и его мл. отца Кирила Терлецкого, епископа луцкого и остроского, и иных аръхимандрытовъ и игуменовъ, в небытности на тот час господина отца Деонисия Збируйского епископа холъмского и белзкого, нарадивши ся со всим свещенънымъ соборомъ нашимъ и то добре усмотревши к намъ пастырем своим моление ихъ зело честно и богоугодно мещан Любелскихъ, при той церкви еже о Христе братство духовное мети, радити, справовати и добрами церковными опекатисе и от вшеляких кривдъ боронити, заступовати мают по чину и встроению братства вышей реченого.

В которой то церкви братству и всим порядкам их нихто жадное переказы чинити не мает, так я сам архиепископъ, яко и епископъ их теперешний холъмъский и по ним будучие наместники того престола и церъкви, сиреч епископи и протопопы и вси причетники церъковные вечными часы, заховуючи а благословение настоящого пастыра епископа холъмъского.

Также на вси порядки духовные церкви Божой потребные благословляем и во всем соединяем сему вышей менованому братству единочестно и единомысльно и правоверно жити водлуг взаконения светое апостолское кафтолическое сиреч соборнее церкви, матере нашая, седми собори вселенскими утъвержоной, ничим не отлучно и послушно, со смиренъномудриемъ, в любвѣ нелицемирной во вся веки строити по обычаю реченъного братства о Господи, всегда с любовию и кротостию собираюсчися.

Свещенников же богоугодных честных православных и достоверных, не корчемных откольже колвек бы трафити и збирати собе могли; при которомъ свещеннику и наука школная чадом своимъ мети, пришелцовъ и убогих по чину школному приймовати, болницу и шпиталь убогих своих любезно и праведно строити, церковное благолипие по силе своей честно украшати, собранное наданое маетности от когож колвекъ благолюбца во влагалищи своемъ и шпиталными братскими праведно справовати и радити мають; в напастех, в бедах и в недузехъ братии своей сановнымъ помагати и до гробу равночестно провожати, нищих, по преставлении брати своей сиротами же и вдовами елико мощно пещи ся, а между братьею своею кротостию и терпениемъ нелицемерно праведно розсужати; ащели же в ниякой вещи недоумеють, се да испытают о семъ иснытнейшаго розсужения иншого братства вышей менованого, а по увищению правилом всим любовно смирити се.

Ащели же кто не будет жити з братством во единой мысли, но противно мысля творити будеть соблазну между братею и не престанет ли, такового тогды епископъ и пастыр епархии тамошнее со розсуждениемъ да отлучат от объщаго братства к целомудрию, а в небытности епископа ино наместникъ его и з ихъ свещенъникомъ братским да изжденуть из церкви; и аще бы кто собе иного искалъ безчинного братства ко уничиждению сему светому братству, таковые да и нѣ меють ни единоя власти во всем строению церковного братства, ибо Господь наш Исус Христос рече: иже нист со мною – на мя естъ, иже не собирает со мною – растачает.

Сего ради от нашого смирения и соборного сего собрания завещевается и во Светом Дусе повелевается быти братству сему неразрушно и неподвижно во веки ниже от єдиного по временем пришлыхъ по них обретаемого епископа, ниже от князей, пановъ или свещенъниковъ, или миръских, под запрещениемъ непрощенъным и отлучением неразрешным от светое восточное кафтолическая Божия церкви светого православия нашого греческаго.

И аще кто явится разорая сия, яко соблазнитель и разоритель и злотворец и дияволу другъ, а врагъ Христу да будет отлучонъ от Отца и Сына и Светого Духа и проклят и по смерти неразрешен и да имеет клятву светых отец иже во Никеи и прочих светых. Богъ же всякоя благодати той да совершит их, да утвердит, да укрепит, сохраняя от всякого вреда. Сего ради сия писания смирения нашого пастырского даемъ имъ, утверъжаючи их благочестно евангелскии жити от ныне и во вечныя роды.

Писан во богоспасаемом граде Берестейскомъ на зъезде нашомъ соборномъ в лито от создания мира семъ тисечей сто першое, а от воплощения Господа Бога и Спаса нашого Исус Христа с преблагословенныя Дѣвы Мария тисеча пят сот деветдесят четвертого мѣсяца июня двадцат осмого дня.

В которого то листу паркгаменового вышей описаного печат митрополяя и подпис руки тыми словы: Михайло Митрополит Киевский и Галицький и всея Руси рукою власною.

А такъ мы король прозбе преречоной яко слушной ласкаве се прихиляючи, лист братства мещан любелскихъ вышей омененый, если они его сут в уживанью, тымъ нинешним листом нашимъ спотвержаемъ и во всих его артикулех, члонках и кондыцияхъ умоцняемъ и в зуполной моцы тыле, иле право посполитое допустити может, оный заховуемъ вечными часы. До которого то потверженья нашого для болшое вери рукою нашою королевскою подписавшися, и печат нашу коронную притиснути есмо казали. Писан у Варшаве на сойме валном коронном тисяча пят сот деветдесят шостого мѣсяця априля двадцат четвертого дня, а панованья кролествъ нашихъ полского девятого а шведского третего. Sigismundus rex. Florian Olieszko secreth[arz] і pisarz.

Записі В. кн. 11, л. 70.


Примітки

Подається за виданням: Грушевський М.С. Твори у 50-и томах. – Львів: Світ, 2004 р., т. 6, с. 339 – 342.