1. В[еликий] кн[язь] Жигимонт Август потверджує священика м.Воїна Аврама Василевича на його становищі, з його доходами, 21 мая 1555 p.

Михайло Грушевський

Кор[оль] Стефан потверджує сю грамоту і старостинське надання десятини від руських міщан м. Воїна, 25 червня 1576 р.

Потверженье попу воинскому на церковъ въ Войне светого Дмитрея и на десятины.

Стефан, Божою милостию корол полский, великий княз литовский, руский, пруский, жомоитский, Полянский, княжа седмигродское.

Ознаймуемы тым листомъ нашымъ, всим вобец и каждому зособна, кому того ведати належит, нинешнимъ и напотомъ будучимъ, иж указовал перед нами учтивый Аврам Василевич, попъ места нашого Воинского церкви светого Дмитрея, листь славное памети Жикгимонта Августа короля продка нашог[о] с подписом власное руки и с печатю Великого князства Литовского, которимъ листомъ тую церковъ в месте нашом Воинском и до нее две волоки земли фундованых ему дати и потвердити рачил, яко то все ширей и достаточней на том листе продка нашог[о] есть описано, которий слово от слова такъ се в собе маеть:

Жикгимонть Августь, Бож[о]ю милостью корол полский, великий княз литовский, руский, прускый, жомотскый, мазовецкий и инымъ.

Бил намъ чолом попъ з Воина на име Аврам Василевичъ церкви святого Дмитра и поведил перед нами, иж владыка володимирскый берестейский Иосифъ поставил его в попы к той церкви воинской, которую он держачи бил намъ чоломъ, абысмо листомъ нашимъ при той церкви его зоставили и с тых земль ку оной церкви наданых от нас господара рушати его не велѣли, якож дей и державца волковыйскый панъ Миколай Нарушевичъ, ревизоромъ тамъ от нас будучи, тых земль церковных в него не одыймовал, якож дей тепер при оной церкви меновите зостало землѣ нашое три волокы. А так кгдыж тая церков при местечку Воинскомъ за росказанемъ нашим господарскимъ есть збудована и фундована, до которое от владыки володимерского попом он поставлень есть, мы з ласкы нашое на чоломбите ег[о] вчинили, при той церкви воинской его зоставили, и тым листом нашим зоставуемъ: мает он тую церковъ светого Дмитрея у Воиню на себе держати, а за нас господара Бога просити, и во всем слушне а рядне водле уставы закону своего греческого справоватися, и теж земль, сеножатей церковных уживати; ведже болшей он там при той церкви земле в себе мет не мает одно две волоки зуполных, с которых нихто его рушати и переказы никоторое в том ему чинити не мает. И на то дали есмо ему сес нашъ листь з нашою печатью. Писан в Петркове лета Божого нароженя тисеча пят сот пятдесятъ пятого месяца мая двадцать первого дня.

Ку тому показовалъ перед нами листь велможного пана Яна Тарла з Щекарович, каштеляна на он час радомского, старосты пилзенского, воинского и ломазского, на которомъ листе описуеть иж за жалобою всих мещан воинских, которие сут вери греческое, то есть Руси, которие бы были приймушани от плебана воинского ку отдаваню десетины на костел полский, то постановене учинил, якобы все мещане места нашого Воинского, которие сут вери греческое, десятины нигде инде одно на церковъ рускую помененому попу воинскому по тому яко и до костела полского плебанови люди вери латинское дают, то есть по копе жита и по копе ярин, а по два гроши с кождого дому давали. На што воит воинский и все мещане вери греческое сами доброволне позволили. И бил намъ чоломъ преречоный богомолецъ нашъ попъ воинское церкви светого Дмитрея, абысмо все то водлугь листу продка нашого на тую церковъ воинскую и землю ку ней наданую, также и десетины з мещан воинских, которие сут вери греческое, водлугь листу впрод реченого Яна Тарла каштеляна радомского и водлугь власного позволенья мещан воинскихъ потвердили ему нашимъ листомъ. А такъ мы видечи в том слушную прозбу ег[о] тую церковъ в месте нашомъ Воинскомъ и две волоки до ней фундованых продокъ нашъ ему потвердилъ, ижъ мещане воинские сами тую десетину поступили (на тім кінчиться).

Записі В. кн. 26 – 27, л. 2.

Примітки

Подається за виданням: Грушевський М.С. Твори у 50-и томах. – Львів: Світ, 2004 р., т. 6, с. 334 – 335.