Початкова сторінка

Михайло Грушевський

Енциклопедія життя і творчості

?

2. В[еликий] кн[язь] Жигимонт Август потверджує священика с. Рудна в Воїнській волості Аврама Василевича на його становищі з його доходами, 24 жовтня 1558 р.

Михайло Грушевський

Кор[оль] Стефан потверджує сю грамоту 25 червня 1576 р.

Потверженье попу руденьскому на церковъ светого Спаса и десетину до ней.

Стефан, Божою милостью король полский, великий княз литовский, руский, пруский, жомоитский, мазовецкий, ифлянский, княжа семикгродское.

Ознаймуемъ тымъ листомъ нашимъ всимъ вобецъ и каждому зособна, кому то ведати належит: указовалъ перед нами ушстивый Аврамъ Василевич, поп церкви светого Спаса з села воинского Рудна, листь славное памети Жикгимонта Августа короля, предка нашого, с подписомъ власное руки и с печатью Великого князства Литовского; которимъ листомъ продокъ нашъ церковъ в селе Рудне светого Спаса и до нее земли волокъ две фундованых, также десетину з села Рудна и Деревячина, с кождое волоки по копе жита, яко сами подданые доброволне дают – позводили ему, потвердити рачилъ, яко то все ширей и достаточней на томъ листе продка нашого есть описано, которий слово отъ слова так се в собе маеть:

Жикгимонтъ Августъ, Божою милостью король полский, великий князь литовский, руский, пруский, жомоитский, мазовецкий и иныхъ.

Билъ намъ чоломъ богомолець нашъ попъ церкви светого Спаса з села староства албо волости Берестейское воинского Рудна Аврамъ Василевичъ и поведилъ перед нами, ижъ перво того Сарафин Воронский, наместьникъ воинский воеводы виленского, маршалка земского, канцлера нашого Великого князства Литовского, старосты берестейского и ковенского, державцы борисовского и шовленского пана Миколая Радивила, а Станиславъ Свидерский, служебникъ подсудка белского Матея Левицкого, будучи на помере волочной у Войне, подданымъ нашимъ руденскимъ а деревеченскимъ церковъ въ селе Рудне збудовати дозволили, и попа до тое церкви на име Мартина Левоновича, давшы ему три волоки земли нашое в том же селе в певныхъ границахь албо межахъ к той церкви, установили; а тые подданые наши селъ верху речоных тому попу десетину от себе с кождое волоки по копе жита давати доброволне поступили. Якож то и мы господаръ для фалы Божое и розмноженя подданыхъ нашихъ тамошних оному попу рудницкому Мартину Левоновичу и потомком его, которие по нем в той церкви светого Спаса попами будуть, за жаданемъ и причиною пана воеводы виленьского потвердили, и на то листь нашъ – потвержене наше на паргамене онъ перед нами покладалъ.

То пакъ дей дворянинъ нашъ ревизор тамошний Иванъ Сопега, будучи за росказанемъ нашимъ на ревизии тамъ у Воине, тые три волоки земле, продку его даные, в него отнялъ, а ему дей водле уставы нашое господарское, такъ яко и иншимъ попомъ, две волоки к той церкви Божой в порядку волочномъ далъ. На чомъ онъ вже и самъ преставаючи, билъ намъ чоломъ, абыхмо при тых двухъ волокахъ, отъ Сопеги ему даныхъ, и теж при оной десетине, которую подданыи наши тых селъ Рудны и Деревечинца на тую церковъ рудневскую давати с кождое волоки по копе жита поступили, зоставили, над то ему нашимъ листомъ потвердили.

Ино кгды ж оная церковъ в селе Рудне за прозбою подданыхъ нашихъ тамо[ч]них тамъ стала, и они сами доброволне таковую десетину з себе на нее давати позволили и поднялисе, а иж теж Сопега тые две волоки на оную церковъ тому попу ведле уставы нашое волочное далъ, на чом он сам переставает, третее ся не допираючы, мы з ласки нашое господарское на чоломбите его то вчинили: на тых двух волоках от Сопеги, яко ревизора тамошнего, тому попу рудневскому поданых и заведеных, по тому ж и при оной десятине з волок руднянскихъ и деревеченскихъ тую церковъ Божую светего Спаса и оного богомольца нашого Аврама Василевича и потомковъ его поповъ, которые по немъ в тое церкви будут, водлугъ першого потверженя зоставуемъ, и симъ листомъ нашимъ знову потвержаемъ: Мает тот попъ спаский Аврамъ и потомки его перворечоныи оные две волоки к той церкви рудневской и деревечинских десетину с кождое волоки по копе жита брати, а за нас господара Бога просити. И на то дали есмо сему сес нашъ листь з нашою печатю. Писанъ в Варшаве лета Божого нароженя тисеча пєт сот пятдесят осмого месеца октебра двадцат четвертого дня.

Ку тому поведилъ перед нами иж подданые наши Руденского войтовства: село Вискы, также войт березовский, подданыи нашы села Березова Кута сами доброволне поступили и позволили ку той церкви руденской десетины давати с кождое волоки по копе жита, якож и лист вызнаня их на тую десятину перед нами покладал, бьючи намъ чолом, абыхмо ему з ласки нашое господарское тую церковь светого Спаса въ селе нашомъ Рудне и две волоки земли до нее наданыхъ водлугъ листу продка нашого, десятину ку той церкви належачих с подданых нашихъ з села Рудна и Деревечинцы, села Висковъ и Березова Кута, с кождое волоки по копе жита, яко они сами водлугъ позволеня своего суть вышей мененому богомолцу нашому попу руденскому и потомкомъ его власнымъ, которие по нем в той церкви светого Спаса в селе Рудне будут, потвержаем и умоцняем тым листом нашимъ: маетъ онъ самъ и потомкове его попы руденские тую церковь светого Спаса в Рудне, земле, до нее наданых и фундованых, з ыными всими землями, сеножатми, до тое церкви належачими, держати и уживати, и десетину з селъ нашихъ Рудна, Деревечина, Висков, Березова Кута, з кождое волоки по копе жита в кождый рокъ брати, окрем пренагабаня и переказы старосты нашого воинского теперешнего и на потом будучих и их подстаростих, справуючисе в той там церкви во всем пристойне по обычаю и порядку закону своего вери греческое, а за нас господара Бога просити повинни будут.

И на то есмо ему и потомком его власнымъ, которие по нем в той церкви светого Спаса попами в Рудне будут, дали тот нашъ листь, подписавши его рукою нашою и росказавши до него печать нашу коронную привесити. Дан в Варшаве дня двадцат пятого месеца июня року по нароженю сына Божого тисеча пять сот семдесят шестого и панованя нашого року первого.

Записі В. кн. 26 – 27, л. 4.


Примітки

Подається за виданням: Грушевський М.С. Твори у 50-и томах. – Львів: Світ, 2004 р., т. 6, с. 335 – 337.