3. Кор[оль] Стефан потверджує селянам Руденського війтівства обов’язки їх, як вони були означені ревізією 1558 р. 26 червня 1576 р.

Михайло Грушевський

Потвержене подданымъ воинскимъ, тром селом, на постановене ревизорское.

Стефан, Божю милостю король полский, великый…

Ознаймуемы тым листом нашим всим вобецъ и каждому зособна, кому то ведати належит, иж указали перед нами подданые наши державы Воинское войтовства Руденского трох сел: Рудное, Березова Кута а Висков три листы уставные ревизора на он час берестейского и воинского Ивана Федоровича Сопеги а Криштофа Кграевского с печатми их, под датою року тисеча пят сот пятдесят осмого, в которих листех своих описуют, иж они будучи на постановеню платовъ, оповеданю уставы их продка нашого Жикгимонта короля Августа и осаженю волок на он час ново помереных в тых селах наших войтовства Руденского, постановили тые три села нашы на осаде и велели ко… платити с кождой волокы села Рудной, яко з кгрунту доброго, циншу двадцать и одинъ грошъ, а с тихъ двух селъ Березовому Куту и Висков циншу, яко з кгрунту середнего, по дванадцяти грошей, а ку тому всим трем селомъ ровно платити уставили с кождое волоки овса бочокъ две албо за овесъ и за отвоз гр. двадцать, сена воз один або за сено и отвоз гр. пять, за гуси, кури и яица гр. полчварта, на неводы гр. два, за стацыю гр. полтретя, осады гр. тридцать, за толоки гр. дванадцать, а за кгвалты перво уставичные жита бочка одна, албо гр. десеть, чого всего сумою з волоки описали селу Руденскому копу одну гр. сорокъ и шесть, а селамъ Березовому Куту и Вискомъ копу одну гр. тридцать семъ, а вже ихъ отъ роботы толок, служебъ и всяких кгвалтовъ и повинностей волными учинили, яко то меновите на тых листех ревизорских уставленых есть описано. И били намъ чолом преречоные подданые нашы войтовства Руденского села Рудны, Березова Кута и Висковъ, абыхмо ихъ при той уставе ревизорской вышей в том листе описаной нашей зоставивши, потвердили и то имъ нашимъ листомъ.

А так мы вырозумевшы з листов и постановеня ревизорского, которое з росказаня предка нашого короля Жикгимонта Августа в тых трех селах Рудной, Березове Куте и Висках есть постановлено, звлаща еслибы постановене ревизорское было остаточное а потомъ жадная повинность на них не вложона, з ласки нашое господарское тых подданых наших вышей мененых трех сел Рудной, Березова Кута и Висковъ при томъ постановеню ревизорскомъ, яко вышей меновите в том листе нашомъ описано, зоставуемы, и то им тым нинешним листомъ нашимъ потвержаемъ и умоцняем на вечность, такъ ижъ тые подданые наши войтовства Руденского села Рудной, Березова Кута и Висковъ водлугъ постановеня ревизорского, яко меновите в том листе нашом описано есть, циншы и вси подачкы на них вложоные отдавати с кождой волоки мает, а болшей над тое постановене ревизорское вышей описаное жадных подачокъ давати, повинностей, робот, толок, кгвалтов, от воженя збожя до берега на спусты и в подводы ездити и никоторое службы тяглое служити не повинны.

Староста нашъ воинский теперешний и напотом будучий и их врядникы над тое постановене ревизорское и тое наше потвержене в том им кривды чинити, болшей подачокъ вытегати и до жадных повинностей и роботь тяглых, отвоженя збожя до берега на спусты и в подводы примушат не мают. И на то есмо им дали тоть листь, подписавшы его власною рукою нашою, и росказавши до него печат нашу коронную привесити. Дан в Варшаве дня двадцать шостого июня месяца року по нароженю сына Божого тисеча пят сот семдесят шостого, а панованья нашого року первого.

Записі В. кн. 26 – 27, л. 6.

Примітки

Подається за виданням: Грушевський М.С. Твори у 50-и томах. – Львів: Світ, 2004 р., т. 6, с. 338 – 339.